Fajita Chicken Roast – Juicy, Spicy aur Zabardast Roast Chicken
Agar aap whole chicken roast banana chahti hain jo taste mein bilkul restaurant style ho, lekin banana bohot easy ho, to Fajita Chicken Roast aap ke liye best recipe hai. Ye recipe khaas tor par un logon ke liye hai jo air fryer use karte hain aur kam mehnat mein lajawab result chahte hain. Is chicken ka andar ka gosht bohot juicy aur soft hota hai jabke bahar se ek khoobsurat golden aur spicy coating ban jati hai.
Is recipe ka sab se khaas hissa iska fajita masala hai. Paprika, cumin, garlic powder aur dried herbs ka combination chicken ko ek smoky, halka spicy aur bohot hi flavorful taste deta hai. Jab ye chicken air fryer mein slow roast hota hai, to saare masalay gosht ke andar tak absorb ho jate hain.
Ingredients
Fajita Masala ke liye
-
Namak – 1 chamach
-
Laal mirch powder – 1 chamach
-
Paprika powder – 2 chamach
-
Garlic powder – 2 chamach
-
Cumin powder (zeera powder) – 2 chamach
-
Dried oregano – 1 bara chamach
-
Dried basil – ½ bara chamach
-
Kali mirch powder – ½ chamach
-
Tail – 2 bare chamach
Main Ingredient
-
Whole chicken – 1.4 kg
Preparation Method
Step 1: Chicken ki Tayyari
Sab se pehle whole chicken ko achi tarah saaf kar lein. Pani se dhone ke baad kitchen towel ya tissue se achhi tarah sukha lein. Chicken ko dry karna bohot zaroori hota hai kyun ke is se masalay achi tarah chipakte hain aur roast zyada behtar hota hai.
Ab spoon ya apni ungliyon ki madad se chicken ki skin ko gosht se dheere dheere loose kar lein. Is baat ka khayal rakhein ke skin phate nahi. Ye step bohot important hai kyun ke masalay seedha gosht ke andar tak jate hain aur chicken extra tasty aur juicy banta hai.
Step 2: Fajita Masala Tayaar Karein
Ek chhoti bowl mein namak, laal mirch powder, paprika powder, garlic powder, cumin powder, dried oregano, dried basil, kali mirch powder aur tail daal kar achi tarah mix kar lein. Ye masala paste bohot hi khushboo daar hota hai aur isi ki wajah se chicken ko fajita style taste milta hai.
Step 3: Chicken ko Masalay Lagana
Ab tayaar kiya hua masala chicken ki skin ke neeche gosht par lagayein. Is masalay ko evenly spread karein taake har bite flavorful ho.
Is ke baad bacha hua masala poore chicken ke upar achi tarah laga dein, legs aur wings ko bhi cover karein. Agar time ho to chicken ko 30 minutes ke liye rest dein taake masalay aur achi tarah absorb ho jayein.
Air Fryer mein Chicken Roast Karna
Step 4: Pehla Roast
Air fryer ko pehle se garam kar lein agar zaroorat ho. Chicken ko breast side neeche rakh kar air fryer basket mein place karein. Is position mein chicken ka breast zyada juicy rehta hai.
Air fryer ko 180°C par set karein aur 40 minutes tak bake karein. Is dauran masalay dheere dheere roast honge aur chicken ka color change hona shuru ho jaye ga.
Step 5: Flip aur Final Roast
40 minutes ke baad chicken ko ehtiyaat se palat dein (breast side upar) aur dobara 180°C par 30–35 minutes ke liye roast karein. Is step se chicken evenly cook hota hai aur upar se bohot hi khoobsurat golden color aa jata hai.
Jab chicken tayaar ho jaye, to us ka rang golden brown hoga aur andar se gosht bohot soft aur juicy hoga. Knife lagane par pani clear niklay ga, jo is baat ki nishani hai ke chicken properly cook ho chuka hai.
Serving Suggestions
Chicken ko air fryer se nikaal kar 2–3 minutes rest dein, phir cut karein. Is se juices settle ho jate hain aur gosht dry nahi hota.
Is Fajita Chicken Roast ko aap:
-
Plain chawal ya butter rice ke saath
-
Garlic sauce ya mayonnaise ke saath
-
Fresh salad ya sautéed sabziyon ke saath
-
Ya soft buns / roti ke saath serve kar sakti hain
Perfect Result ke Tips
-
Chicken ko hamesha achi tarah sukha kar masalay lagayein
-
Masalay skin ke neeche lagana na bhoolain
-
Air fryer basket zyada bhara hua na ho
-
Serve karne se pehle chicken ko rest zaroor dein
Ye Fajita Chicken Roast recipe taste mein itni zabardast hai ke ek baar banane ke baad ghar walay baar baar demand karein ge. Kam mehnat, kam ingredients aur lajawab result – ye recipe zaroor try karein.
✨Did you try this recipe? Let me know in the comments how it turned out! Don't forget to share it with your queens👑
Comments
Post a Comment